قصيدة ( الوسيمَه )

ماعاد ودي بك ولا عاد لي فيك..
يغنيني الله.. كان ربك قد اغناك..

وش فايدة حبك بليا مباديك..
يامن تعيش الحب من دون مبداك..

عشتك.. ولا غيري يعرفك ويغليك..
قلبك كبير.. ويسكنه كل من جاك..

كنت إتسلى.. لين خانك تسليك..
مع واحدن.. من جيت له ماتعداك..

ياقطع قلبك.. ماتحسبه يخليك..؟
وماتحسب ان القلب بالوقت يسلاك..

لا والله الا.. عفت شوفك.. وطاريك..
واعاف كل انسان شافك وطراك..

دوك الوسيمه جعل ربي يعافيك..
من قلب.. قد حبك.. وخنته وخلاك..

درب الغلا جابك.. وذا هو يوديك..
الله معك.. والله يحفظك.. ويرعاك..