قصيدة قائد وقاده وشعب ٍ ودوله

من لامني في حب قائد وقاده
في ذمتي انه ياهل العرف مجنون
حب القياده في الضمائر عباده
يخسون من عادو هل الجود يخسون
حكامنا منا وفينا سياده
ماجات بالمدفع ولاجات بالهون
جات بسهر عين وصبر وجلاده
لاسعادنا والشعب شاكر وممنون
شعب ٍ عطاه الله عزم ٍ وإراده
مدة كريم الوجه ومدبر الكون
شعب ٍ التكاثر في زمان الاباده
شعب التقدم واكثر الناس في دون
شعب ٍ صمد في وجه وقت النكاده
وقت ٍ مضى كل الخلائق يعرفون
كان البلد مافيه حتى العياده
واليوم مرضانا هنا مايروحون
مريضنا اللي عالجه من بلاده
مرضى العرب في الغرب ماهم يصحون
للمسلمين بلادنا مستفاده
وشيوخنا بعد العطا مايمنون
طيب ٍ لراعي الطيب يعطى زياده
وشر ٍ لراعي الشر ويموت مغبون
جويرهم يهناه شربه وزاده
ووعودهم تاصل على الوعد يوفون
واللي يدور للقشر والقراده
ياتي لهم بقرون مارد بقرون
عدوهم ضوه تعود رماده
يرجع وهو يحمل ثمانين طاعون
يحرم عليه انه يحصل مراده
دارٍ لاهلها واكثر الناس يوحون
اذا دعانا الشيخ ولا زناده
على قلوب اهل الشجاعه يمونون
حنا ندور في الرخى للشهاده
وش عاد لو نادو هل الجود تكفون
صغيرنا اللي باقي ٍ في مهاده
يرضع غلاهم وان كبر صار مشحون
وختامها عسى الجميع بسعاده
ياهل الوفا والجود والعلم تدرون
حكامنا منا وفينا سياده
ماجات بالمدفع ولاجات بالهون