قصيدة حطام

هذا الحمام اللي سكن بيتك على بعدك ينوح
من رحت عنه حالته هذه وسِط وحشة ظلام
وهذه الزوايا ودّها تسمع صدى صوتك يلوح
علّ وعسى تنقذ بقايا اللي بقى من هالحطام
حتى الزهر ما هو زهر عيّا لجل غيرك يفوح
يسأل متى يرجع شذى عطرك، شذى عطر الخزام
والغرفه اللي ارسمَت طيفك، حنينك والطموح
تندب ردى حظٍ سرق منها سواليف الغرام
كل المرايا اتهشّمت واتناثرت حزن وجروح
تصرخ تبي طيفك تبي رسمك تبي منّك سلام
شفت السرير اللي حضن حزنك إذا ودّك تبوح ؟
اليوم يشكي من غيابك يا بعد كل الأنام
يا صاحبي دام الهجر هدّم على بعدك صروح
وشلون ما يهدم وليفٍ تحْمِلَه رجل و عظام