قصيدة احرجتني ليش

وقفتني يا صاحبي موقف احراج
ما دام مالك خاطر احرجتني ليش
يعني عشان اني لصحبتك محتاج
عذبتني واشقيت روحي عشان ايش
يا ابو ثمانٍ نوضها بالغسق راج
مثل البروق السامرات المراهيش
ياورد عوده للهوى غصب ينعاج
خلا غصونه راهي الماء عشانيش
نظرتك بلسم للمجاريح وعلاج
تشفي عطيب الود شوفتك ويعيش
يا من دفا وصله بحضن العنا داج
لو راح عن حضني دفاك التحف بيش
جرحك لمفتوق الحشى سبب ازعاج
اجرح فديتك بس بشويش بشويش
قد كان هملول الصخا منك هداج
واليوم شحت بارضنا لقمة العيش
تاتي كتايب صدك اسراب وافواج
وارسل عليك الود من خاطري جيش
بنيت لي بأرض الجفا عالي ابراج
قفرٍ منازلها ولابه مطاريش
فكري على دفة سواريك مواج
كنه غريرٍ كزته مرحلة طيش
صدر بشريانه صبيب العنا لاج
وصدرٍ دفق نبضه تجاهل وتهميش
لو كان مينا الاحمدي صوب قرطاج
كان التقى وادي تباله مع بيش
كم مرة قلت لك يا تاج يا تاج
ما يسكن المسمار قصر الشواكيش
لو كنت تفرش له حرير وديباج
من بعد شوفه عندكم زول شاويش
قصر يضمك حاكمه شبك وسياج
والمشكله حوله عساكر وتفتيش
ذكراك معبد والهواجيس حجاج
والشوق لوحه والمشاعر مناقيش
يا حمس قلبي حمس بنٍ على صاج
من واحد لا ارمشت له قال مافيش
الوجد للشاعر نظر عين وسراج
لو غاب عن عينه نظرها يرى بيش
يا بدر نوره في دجى الليل وهاج
يضوي سناه ولمعته لأبرق الريش
حبري على بيض الورق صار مكياج
واتلى التلايا يمكن اكتب على خيش