قصيدة فرحة مهني

ماجيت متكاسل ولاجيت مجبور
لكن بيوت الشعر جاءت دعتني
قالت تبي تصبح معلّم ومشهور
للمملكة تكتب قصيد وتغنّي
وافقتها وانا بهالعرض مسرور
وصغت شعري بعد ماخترت لحني
كتبت أبياتي على خافت النور
فالمملكة تستاهل الروح منّي
أرض الحضاره مجدها عالي السور
شوقي إلى أرض السّعاده حملني
تاريخها محفوظ والعيد مشهور
وحبّها في روضته قد سجنّي
يامنبع الّؤلؤ وياجنّة الحور
يادرّةً والحسن فيها فتنّي
آل الخليفة حكمهم صار دستور
من غيرهم يحمل لواها ويبني
نفخر بدولْتهم على مرّ لعصور
ينبض لهم قلبي بكلّ التمنّي
حمد ملكها بواحة الطيب مذكور
مكارمه من كثرها أذهلتني
جزل العطايا مدّته مدّة بحور
هويزرع المعروف والشعب يجني
وكلّنا بالعيد فرحان مسرور
تستاهل البحرين فرحة مهنّي