قصيدة اللي من اول لا بكى يشتكي لي

راع الهوى دايم يجر المواويل=قلبه يحط من الهموم ويشيلي

ما دامت اني بالعنى ساهر الليل=لن طال يومي بالعنى طال ليلي

أمرار اقول .. إيجي للأيام تعديل=وامرار اقول .... الله يا ويل ويلي

من واحد(ن) سبة جميع الغرابيل=ليته تبلى فالأوآدم بديلي

يا صرختي زيدي عسى يسمعك حيل=ويا صمت قلّه فالزمن وش بقيلي

ويا ونتي خليه يوحيك من ويل=ويا دمعتي من فوق الأوجان سيلي

ما أدري طلعت إل ناس عالين بالحيل=ولا نزلت لجيل ماهو بجيلي

أشكي عليك الحال يا نجمة سهيل=من واحد(ن) ما جا .. بما يستوي لي

لا موفي الوزنه ولا موفي الكيل=وإليا عطى ما يعطي ألا القليلي

حمّل فؤادي بالهوى والهوى شيل=مالي يكود الصبر .. والله وكيلي

اللي من أول ما يجي بيننا ميل=وآنا معه خل(ن) لقاله خليلي

واللي من أول لا ضحك مبسمه هيل=واللي من أول لا بكى يشتكي لي

الصبر من قولة هل الشام في غيل=والحظ من قولة هل النيل نيلي

اما عطو قلب المولّع تعاليل=ولا دخيل الله .... خلّو سبيلي

يا طعنة الفارس ويا ركضة الخيل=لا تجعل النيره براس الفتيلي

أخاف من قولة فتى شاله السيل= ضلى بعز .... وحوله في نثيلي