( ياغايبٍ عني ترى للبطى لوم
لا شافتك عيني ولا جبت طاري )
هذي قصيدة خالد بهاك الألبوم
طرت علي من لوعتي وانتظاري
لأن غيابك ياطويل العمر يوم
عندي شهر وإن طال سبّب دماري
تكفى يابومتعب ترى القلب مهموم
متى تجي واستقبلك بالمطاري
وانثر على موكب فخامتك يشموم
وآزف دربك بالبخور الظفاري
ياقايد الجبهات ياهازم خصوم
ارجع ترى طالت علي المساري
المملكة في كوم والشعب في كوم
كلٍ على فرقاك تصلاه ناري
غربتك غربة شعب بائس ومحروم
محروم شوفك يازعيم الحراري
شعبك يحبّك ياطويل العمر دوم
دمعه على فرقاك شلال جاري
يدعي لك بليل التنهات ويصوم
يرجي عسى الباري يرجّعْك باري
حتى الآرامل ماهنا جفنها النوم
وايضا اليتامى وانت مانته بداري
حتى الفرح ياسيدي بات معدوم
كنه معك سافر وخلاّ الدياري
مشكلتي شاعر بالطواريق مهيوم
ياليتني جراّح والا استشاري
واكشف على ظهرك وآعالجك وتقوم
وتعود سالم والفرح لك يباري
هذا هواء بالي يابو متعب اليوم
هذا طموحي يالملك بإختصاري
ياخادم البيتين شعري بك يروم
فوق القمم تذرى عليه الذواري
ارجع خلاص وبدّد أشباح وغيوم
لا بالمساء نسلا ولا بالنهاري
تكفى يابومتعب ترى القلب مهموم
متى تجي وافرح بشوفك وآماري
الأحد ديسمبر 26, 2010 4:45 am